BLEKK presenterer: ARIANA REINES! I samtale med Anna Kleiva og Eira Søyseth

Tid: 26. august kl 19.00
Stad: Landmark, Bergen kunsthall
Inngangsbillett: 100 kroner

BLEKK presenterer: ARIANA REINES! I samtale med Anna Kleiva og Eira Søyseth.
Ariana Reines, ein av notidas mest tonegjevande poetar, gjer et stopp innom Bergen i august!

Dei to siste åra har Ariana Reines gitt ut to nye bøker: Wave of Blood, som i år blir omsett til norsk på HOF av Anna Kleiva, og The Rose. Dei to bøkene er ulike i både form og tematikk, men filtrar seg samtidig inn i kvarandre, og viser spennet i Reines sin forfattarskap. Der Wave of Blood er ei essaystisk-poetisk utforsking av folkemord, skuld, språk og offentlegheit, og korleis alt dette er kopla til kroppen, er The Rose ei diktsamling av meir tradisjonelt format, som attpåtil tek for seg eit av dei største poetiske motiva: kjærleiken og den poetiske symbolikken knytt til kjærleik, med utgangspunkt i roseblomen.

Under arrangementet i Bergen vil det bli lese frå og snakka om begge bøkene. Kom gjerne med dine eigne spørsmål knytt til utgivingane, då vi også opnar for spørsmål og ein utvida samtale i andre del. Vi gler oss til å få storstilt besøk!

Ariana Reines arbeider med poesi, skodespel, performance og astrologi. Ho er ein tenkande poet som går i dialog med hendingar og retorikk i samtida, så vel som med eldgamle tekster.