Nightblooming: Høgtlesing i Muséhagen

Som ein del av formidlingsprogrammet for utstillinga Nightblooming av Ananda Serné, inviterer Hordaland kunstsenter til eit lunsjarrangement i Muséhagen.

Arrangementet startar med høgtlesning inne i Plantehuset, drivhuset som ligg i Muséhagen, ved sidan av Naturhistorisk museum i Bergen. Daniela Ramos Arias og Cecilie Størkson, som har vore kuratorar for utstillinga, deler frå tekstar som tangerer element frå utstillinga.

Ta gjerne med deg teiknesaker, strikketøy eller liknande, om du likar å gjere noko med hendene medan du lyttar!

Etter leseøkta inviterer me til lunsj på Hordaland kunstsenter, der det også vil bli moglegheit til å sjå utstillinga for dei som vil.

OM UTSTILLINGA NIGHTBLOOMING
Utstillinga Nightblooming av Ananda Serné har vakse ut frå kunstnaren sitt besøk ved eit orkidégartneri i Taiwan. Orkidéar dyrka frå frø på dette gartneriet blir sende til verdas største blomeauksjon, i nærleiken av Amsterdam. Derfrå finn dei vegen til vinduskarmar over heile Europa.

Gjennom arbeid der lys er ein gjennomgåande komponent - silketrykte og graverte verk i glas, handblåste lamper, tekstil farga med lys og opptak gjort på 16 mm-film - reflekterer Serné over døgnrytme, mennesket si kommersialisering av og vitskapelege inngrep i naturen, og kontrastane som oppstår mellom orkidéen som vare og orkidéen i seg sjølv.